Pang ulee baroe

[sumber: Harian Aceh, 22 April 2012]

Saleum lon peuphon haba loen rawi

Saleum keu nabi pang ulee doenya

Sihat beuna raseuki geubi

Oleh poe rabbi si-umu masa

Jinoe loen kisah aceh meusyuhu

Kalheh peumilu samboet peumimpin baru

Harapan di-uloen aceh bek le karu

Aman ngoen makmu tanyoe sijahteura

Di-pak Geuchik dusoen geupimpin

Mandum gobnyan poe kuasa

Lee pak Bupati bek keuh teu-iem

Keurija beurajin bek laloe ngoen doenya

Doktoe Zaini cukop meutuah

Tari ngoen ceudah murah lom seunyum

Beupanyang umu beusihat badan

Mangat geumat kuasa di aceh raya

Keu pak muzakir wakie pang ulee

Dari awai dilee gata di aceh

Phon masa prang sampoe jinoe ka aman

Gata na di nanggroe aceh mutuah

Seulamat datang pang ulee baroe

Gata kamoe samboet deungoen seunyuman

Nyang kamoe harap nibak ureung nyan

Rakyat beuseunang nanggroe sijahtra

Beu bek-na lee karu di-nanggroe tanyoe

Bek na seumeupoh takaloen di-keu mata

Keurija beuna raseuki beulee

Harapan kamoe di-aneuk bangsa

Na keuh lom harapan kamoe lam naggroe

Keu-bapak Gubernur dan Peujabat dumna

Bek neu-ingkar janji nyang ka geubri

Beuna teupati nyan janji keu kamoe amanah

Kasep keuh oh-n’oe haba loen rawi

Meu’ah beu-neubrie di-gata dumna

Ata nyang beutoi dari poe rabbi

Na salah bak meurawi peuwoe keu-uloen

Banda Aceh, 11 April 2012

Rahmatsyah, Mahasiswa PBSI 2010

Bergiat di Rampagoe (Komunitas Sastra)

kisah

Saleum lon peutroh keubandum rakan

Nyang dijioh lom nyang dikeu ulon nyoe

Masa jinoe aneuk muda ureung peugah dum kasmaran

Bahasa aneuk muda cinta lam lumpoe

Bacut lon rawi nibak haba cinta aeuk muda

Malam na geucalitra sampoe troh beungoh

Hate jih gundah badan saket pikeran jih lupa

Meunan keuh sidroe dara nyang jineuk peugadoh

Leupah susah keuadan sidroe agam nyoe

Hudep jih susah deungon dua droe dara

Uroe teuingat malam jilumpoe

Gadoh meugadoh hate nyang lara

Bak saboh masa si aneuk muda

Mita pilihan peulhueh jawaban

Keu dua droe dara nyang lam dada

Mantong meuputa-puta hana pilehan

Nyang sidroe dara leupah dicinta

Leupah dipuja teuma sidara cinta ka gadoh

Lom sidroe dara teuk keu siagam cukop that cinta

Teuma cukop sayang siagam dijaga tan meu’oh

Leupah gundah siagam nyoe kereuna cinta

Hate sidara dijaga bek na keuh saket

Beuthat pih siagam nyoe pilehan goh na

Bak ujong ceurita sidroe dara pasti na nyang saket

rampagoe poe gemasatrin

Lam gemasastrin jinoe kana rampagoe
Kiban cara hai rakan nyan beu idong
Bek geutanyoe gadoh sigoe sahoe
Gara adek leting kapeuget keu inoeng

Peusijuek aneuk 2011 tanyoe peuleumah phon
Tanyoe mupanton tanyoe mulaga
Nyoe rampage goh na sithon
Bek roh malee euntek hana meuhoe ba muka

Jinoe hai aneuk rampagoe tapeubudoh budaya aceh
Bah pi jipeugah karap hana le
Na geubi lumpoe geutanyoe tampil di tv aceh
Tapeuleumah nibak ureung rampagoe baroe lahe

Agak gura lon balah ata gata hai rakan
Meunoe keuh cara lon peubudoh rampagoe
Nyoe harapan nibak lon keu bandum rakan
Beu yakin tanyoe rampagoe bek sigoe sahoe

Lon peu abeh haba sampe disinoe
Pajan na wate tasambong teuma
Pat na salah peugah baka haba lon nyoe
Bek tuwoe neupeugah tameurumpok dua

Rahmatsyah (abu).
Peunanggung jawab rampagoe

Woe u gampong

Bak puasa keu limoeng ulon jak u banda

Meujak tuntot ileumeudep lam rantoe

Teuma jinoe karap uroe raya

Dari rantoe gampoeng ulon woe

Bak seupot rabu ulon ek motoe

Dalam pruet soh mantong puasa

Bah pi jih bak lon woe

Nyang peunteng meusapat bak uroe raya

Nibak haba nyoe lon neuk peugah bacut

Teuntang lon hek bak jalan

Dirumoh lon ka lee aneuk miet cut-cut

Dari aneuk wa ramulah sampoe aneuk pak dahlan

Cukop that mumang hai rakan lam motoe

Kareuna jioh bak perjalanan

Dari banda u aceh utara beusampoe

Bahpi siat meusapat ngoen syedara atawa rakan

Poh limoeng seupot ulon beurangkat

Lam motoe L300 hinan meusak-sak

Dan pih teungoh lon woe meuri ka saket

Meulake beupuleh nyan doa cut kak

Lhee jeum lam motoe katrok u grong-grong

Ule mumang pruet jiputa

Lumpoe teutap keudeh u gampong

Kareuna ulon geupreh lee poma

Meu’ah beurayeuk wahe rakan

Kareuna nyoe haba leupah gura

Nyang peunteng bek neubaca sikhan

Neubaca beu-abeh mangat lon bahgia

Rahmatsyah (abu)

Meu-uroe raya

Saleum lon peutroh keu bandum rakan

Tamumat jaroe tanda mulia

Singoh uroe raya neubri le tuhan

Ubena bandum asoe langet ngoen bumoe bahgia

Bacut lon peugah masa sitahoen

Lam masa nyan bak bandum syedara

Le that dosa tapubuet lam tiep-tiep thoen

Dosa ngoen tuhan lom deungon manusia

Takeubi tadingoe dum rata sagoe

Hate teuseunang bak uroe raya

Dari phon puasa doa uroe raya beusampoe

Beupanyang umu tamelake betrok lom teuma

Silaturahmi beugoet tajaga

Bek putoh syedara nyan buet nyang geularang

Jame troh beuna tapeumulia

Bek tuwoe sit makanan meuhidang

Nyan keu geupeugah le ureung tuha

Mulia jame ranup lampuan

Mulia rakan mameh suara

Beureukat geubi ka le tuhan

Udep lam donya nyoe hana meutente

Buku amai geutop mate jiteuka

Kareuna nyan meu’ah siploh jaroe lon lake

Dosa nyang awai sampoe dosa teuma

Haba lon kirem kata lon susoen

Geulantoe tuboh ngoen gaki meulangkah

Meu’ah beuna tiep uroe dak jeut bektiep thoen

Bek putoh syedara subab tanoh sijeungkai leubeh sihah

Kadang na leubeh haba bak lon mariet

Kadang na meupeh ulelam kawan rame

Mungken lom itubiet geuntoet bee meuhiet-hiet

Taduek sapat rakan atawa syedara nyang male

Meu’ah beurayek nibak uroe nyang meutuah

Tameulake bak tuhan bandum beujroh asoe syiruga

Syedara han putoh akai brok teu beuglah

Meu’ah lahe ngoen baten dari lon nyang jioh dimata

seulamat uroe raya IDUL FITRI 1432H

meu’ah lahe ngoen baten

Rahmatsyah (abu)

Udep lam rantoe lage glang lam uroe tarek

Lon bacut ceurita deungon bahasa aceh

Bacut neuk kisah aneuk lam rantoe

Nibak phon trok goh jeut keu cheh

Hate meususah nyanpah lon moe

Hana meuhoe jak hana meuhoe ra ueh

Kakeuh meuputa-puta didalam kama

Meujak ceurita nibak poma takot weuh

 Nuek peugah bak aduen tapi hana syedara

Chit leupah seudeh udep dirantoe

Hana soe hiroe hana soe jaga

Bah pi meunan dilon na saboh lumpoe

Beu ek peuseunang ku ngoen ma

Udep lam rantoe lage glang lam uroe tarek

Meunan lon dingoe nibak rakan sinaroe

Uroe sehat malam ka saket

Meunan peudeh udep dirantoe

Meunan keuh hai rakan phon dilon lam rantoe

Phet ngoen masen chit ka meurasa

Doa sabe lon lake nibak poe

Beu ek lon peuseunang ku ngoen ma

Beu ek lon peuseunang dua ureung nyan

Nyan ka susah geumita raseki

Bah pi hana keudroe keutan

Nyang peunteng aneuk bek jeut pancuri

Sampoe nyoe mantong dilon ceurita

Nuepeumeuah pat na haba nyan salah

Kareuna dilon baroe phon nibak haba

Bek neupeurayek bek neupeumeugah

Rahmatsyah (abu)